Dening Dr Purwadi M.Hum. Ketua Lembaga Olah Kajian Nusantara LOKANTARA Hp 087864404347
A. Abdi Dalem Pakasa
Pakasa iku ringkesan saka ukara Paguyuban Kawula Karaton Surakarta Hadiningrat. Dumadi wiwit tanggal 29 Nopember 1931. Kang yasa Sinuwun Paku Buwana X, narendra gung binathara kang ngasta tahun 1893-1939.
Saiki abdi dalem Pakasa samebar saindhenging jagad. Pakasa Punjer mbawahi Pakasa kang tuwuh ing sadhengah papan. Upamane tlatah Sukoharjo, Boyolali, Surakarta, Karanganyar, Wonogiri, Sragen, Klaten. Daerah mau katelah Subosuko Wonosraten.
Ing dina Minggu, 16 Januari sejarah Pakasa lumaku gancar lancar. Tetepan lan wisuda Abdi dalem Karaton Surakarta Hadiningrat pang Nganjuk. Ing Kedondong Bagor Nganjuk Pakasa dipandhegani KRAT Sukoco Madunagoro S.Pd MM.
Titi laksana hadicara karumpaka kanthi titi permati. Kareben Pahargyan ageng mimbuhi kawibawan kawidadan kabagyan sarta kamulyan.
1 Pambuko di iringi lagu Indonesia Raya.
2 Pasugatan Tari Gambyong
- Kirab Tumpeng lan wilujengan ( Gending ladrang wilujeng )
- Doa.
- Pambagio Harjo Pakasa Nganjuk
- Sabdatomo Bupati ingkang mewakili.
- Sumene / Istirahat
- Dawuh pangandikan saking Ketua Lembaga Dewan Adat Drs. GKR Koesmurtiyah Wadansari. M.Pd utawi Pangageng Sasono Wilopo Keraton Surakarta Hadiningrat.
- Serah pinampi ganjaran pangkat lan
sesebatan. - Wejangan Pakasa Punjer DR . KPH Wirobumi. SH
- Tetepan Pakasa Pang Nganjuk
- Monosuko
- Penutup.
Sedina sakdurunge, yaiku tanggal 15 Januari KMAT Srimurtini Madusari SE MM nyamektakake ubarampe pahargyan. Wiwit gladhen gamelan, karawitan, gendhing, tari. Paraga kang ngayahi wajib alumni SMKI, ISI Surakarta, siswa SMEA lan SMA. Ditambah pengrawit kang mumpuni.
Rerenggan ditata endah edi peni. Pasugatan dhahar ngunjuk kang edi mirasa. Kabeh wis siaga ing gati, sawega ing dhiri.
B. Titi Laksana Hadicara Kepyakan
Dina Minggu 16 Januari 2022 nama wigati. Abdi dalem Karaton Surakarta Hadiningrat pang Nganjuk ngadani upacara wisuda srah tinampen pangkat lan sesebatan.
Kepareng rawuh Dra GKR Wandansari Koes Murtiyah M.Pd. Panjenengan dalem putri Sri Susuhunan Paku Buwana XII. Ngasta ketua Lembaga Dewan Adat lan Pengageng Sasana Wilapa. Tedhak ing bumi Nganjuk ibarat pangarsa Kahyangan Junggring Salaka arsa ngedum kabagyan ing madyapada. Saknalika tanah Nganjuk dadi subur makmur, tebih saka coba bilahi. Kang ana mung urip ayem tentrem.
Wondene Dr KPH Wirobhumi SH MM paring sabdatama. Warga Pakasa Nganjuk tambah gumreget gumregut gumregah. Kanthi pangajab budaya sangsaya ngrembaka ing nusantara.
Abdi dalem kang kaparingan ganjaran pangkat lan sesebatan pikantuk bebungah agung. Ibarat kebanjiran segara madu, kejugrugan gunung sari. Gembira amarwata suta. Katon sumringah bombong ing galih.
Kakung putri ngagem busana Jawa jangkep genep genah. Kakung bebedan, blangkonan, beskap, sabuk epek, sabuk wala, samir, bros radya laksana, slop. Gagah merbawani. Dene priyayi putri ngagem kebaya ireng, sanggul, nyamping. Ing sajuru juru sarwa gumebyar.
Swara gendhing ngumandhang ing awang awang. Ladrang wilujeng kanthi pangajab padha nemu wilujeng slamet. Gendhing monggang mahargya pangageng lan sentana Kraton Surakarta Hadiningrat. Swasana dadi agung ngrembuyung.
Pahargyan kapurwakan kanthi olah gelaring tari gambyong mari kangen. Kendhangane sigrak, iramane gumyak, kepireng kepenak, kang rawuh tambah jenak, dhasar suguhane enak. Kena diarani mat matan. Paraga tari isih nempuh pasinaon SMA. Solah bawane gandhes luwes merak ati.
Kepareng ngestreni kadang Pakasa Kediri, Trenggalek, Sragen, Tulungagung. Saking guyube kabeh kadhapuk dadi among tamu. Iki sing diarani guyub rukun. Papan ing Jl Semeru Sanggrahan Kedondong Bagor Nganjuk nyathet sejarah kang misuwur. Pak Camat lan Pak Kapolsek Bagor kersa ndherek mangayu bagya. Iki sing diarani manunggaling jawula Gusti.
Kawula kang kaganjar pangkat lan sesebatan diparingi serat Kekancingan. Tumuli dikalungi samir dening KGPH Mangkubumi, Pangeran Pati. Putra Sinuwun Paku Buwana XIV pancen bagus alus besus.
Kembul bujana andrawina. Tumpeng wilujengan dilorot. Padha ngalap berkah. Sega golong, jajan pasar, jenang abang. Tandha kehing sengkala padha sumingkir. Donga pamuji murih sami basuki lestari.
Pasugatan dhahar ngunjuk watara jam 13. Nedheng nedhenging dhahar siang. Eca mirasa. Maneka dhaharan cumawis. Maneka unjukan cumepak. Pasugatan pinilih gawe renaning penggalih.
Tedhak sungging gambar foto, dokumentasi rekaman video. Katata pacak baris. Disawang ketok manis patitis. Mesem ngguyu medharke anteb marem ing kalbu.
Gunung Wilis sisih kidul. Gunung pandhan sisih lor. Kutha Nganjuk jeneng beja kemayangan. Tedhaking pangageng Karaton Surakarta Hadiningrat mimbuhi asrining kahanan. Kang kaajab bumi Nganjuk tambah panjang punjung pasir wukir, gemah ripah loh jinawi, tata tentrem karta raharja.
Para abdi dalem Karaton Surakarta Hadiningrat pang Nganjuk netepi gawa gawe kang wus dadi kewajiban. Kanthi sesanti rum kuncaraning bangsa dumunung ing luhuring budaya.
